و اخيرا حكاية بشكوط ياسمين بالتفصيل

     شرمولة X بشكوط ياسمين

فى يوم و انا ماشى للسوق وبالتحديد سوبر ماركت  الصابرى لى عرب بنغازى كلهم يعرفوه ،  كنت ما شى انا و امى بيش انجيبو اسبيزة الحوش (سبيزه = مونة ) للى ما يعرفش شن معنى كلمة سبيزة ، المهم خطمنا على جيهة البشكايط و لقيت لمى ماسكه باكو بشكوط ياسمين بس مش زى لى كلكم تعرفوه ، اصله هضا متغير شويا ، مكتوب عليه بشكوط (ياسمين بنكهة الليمون ) زى ما اتشوفى فى الصورة بش ما حدش ايقول عليا كذاب و لا انا اندير فى دعايه مش مزبوطة .

المهم قلت لى امى شن تبي فيه راهو البشكوط هضا بالليمون ، تخيلو بشكوط محشى بكريمة الليمون ، و بش انكون معاكم حقانى هو بشكوط ياسمسن العادى طعمته باهية لكن بالليمون ما نيش عارف ، لكن امى كا عادتها ما عدلتش عليا و حطت باكوين بشكوط ياسمين بالليمون فى الكروسة و كملنا باقى الجولة فى الدكان ، و روحنا الحوش .

اول ما روحت قلت خلينى انضوق هال بشكوط  ، فتحت الباكو زى ما انتو شايفين فى الصورة

المفاجأة شن اتوقعوا؟

لقيت الباكو فيه بشكوط عادى ما فيه لا كريمة و لا نكهة ليمون و الصورة اتوضح

يعنى انضحك علينا و صدق المثل لى ايقول (يا امزوق من بره ، شن حالك من جوه ) و طلعوا الجماعة امتاع مصنع البشكوط املفقين الموضوع ، يعنى المفروض ايصنعو البشكوط بنكهة الليمون و جابو التغليف و المواد لكن اكيده سرقوا ميزانيتهن فى نص الطريق كالعاده فا قالو شن انديرو للكواغط ، هيا انحطو فيهم البشكوط العادى ، شن يبي ايصير الشعب الليبي عبيط و ياكل اي حاجة و ما ايعدلش عال حاجات هذى ، يعنى شن فيها اذا كان الباكو مكتوب عليه حاجة و من جوه فى حاجة اخرى ، اااااااااااااااااخ .

يعنى بعد هال استغفال شن فى مازال ، توا يعنى لو كان الموضوع هذا ايام زمان ، ايام القحط و الحصار اهو انقولو ! لكن توا فى الوقت هضا لى الناس كلهم ايشوفوا فى التلفزيون و البضايع من جميع انحاء العالم اشكال و الوان . لا و قالك شنو ليبيا الغد لا واضح جدا تى نحنا مازلنا قاعدين فى اول امس مش حتى اليوم . يعنى هذا واحد من الامثله  البسيطة و الواضحة على انه بلادنا مازلت متخلفة  و تبيلها لين تتطور اذا كان بشكوط  ما زلنا انلبزو فيه فما بالك الحاجات الاخرى .  لا ولى قاهرنى انى داير روحى فطنى و انقول لى امي لا ما تشريش البشكوط و نشرح و انعاند . يلا خيرها فى غيرها بس خايف شى يوم نلقا فى السوق بشكوط ياسمين محشى بالشرمولة .